муз. и сл. Сапара Узденова

Гитчеликден биз ёсгенек бир элде,
Ол сагъатда джокъ эд сюймеклик эсде.
Ёсе келиб, мен эследим сени ариу сыфатынгы,
Энди уа джашырама атынгы,
Кёзюуледе къарасам а сени ариу суратынга,
Чакъырама сабийликни ызына.

Эсингдемид, биз чыкъгъанек бир кере,
Джыяйыкъ деб джанкъозланы, кюн бетге.
Мен джыйгъанларымы саулай сеннге саугъагъа бергенем,
Сен аланы барын тёкгененг.
Сора мен да ачыуланыб, джанкъозланы теблегенем - 
Сабийликден гюнахлыкъ этгенем.

Сабий кюнле бизден кери кетдиле,
Бирер мурат ала бизге бердиле.
Сен энтда эсде тураса! Сюеме биягъыллай,
Артыкъсызда джанкъозла чакъгъанлай. 
Чыгъыучанма эринмейин, джаз келгенлей ол кюнбетге,
Сыртымдан джатама ол джерге.